Besta deildin: Sigur og þrjú stig heim frá Hlíðarenda

20.09.2026
Byrjunarliðið gegn Val í 19. umferðinni í gær. Nöfn leikmanna eru inni í fréttinni. - - -
Byrjunarliðið gegn Val í 19. umferðinni í gær. Nöfn leikmanna eru inni í fréttinni.
- - -

Þór/KA vann 1-0 sigur á Val á útivelli í 19. umferð Bestu deildarinnar, sem jafnframt var fyrsta umferð í neðri hluta deildarinnar eftir skiptingu. Margrét Árnadóttir skoraði eina mark leiksins í seinni hálfleiknum.

Spennan magnast með hverjum leik og hverri umferð í baráttu fjögurra neðstu liðanna við að forðast fall úr deildinni. Með sigrinum í gær komst Þór/KA úr botnsætinu upp í 8. sætið. Þegar tveimur umferðum er ólokið er Fram með 23 stig, Þór/KA 22 stig, Víkingur 21 stig og Valur 20 stig.

Leikurinn í gær einkenndist af mikilli baráttu enda hvert einasta stig mikilvægt á þessum lokakafla deildarinnar. Ástríðan að baki leiknum var mikil og bæði lið börðust af hörku. Baráttan og ástríðan innan vallar sem utan var til fyrirmyndar og sigurviljinn sannarlega til staðar. Á endanum skilaði það sigri og þremur dýrmætum stigum í hnífjafnri baráttu fjögurra liða. 

Þó ekkert hafi verið skorað í fyrri hálfleiknum voru færin til staðar. Margrét Árnadóttir átti skot í stöng á 8. mínútu og um tveimur mínútum síðar lagði Margrét boltann fyrir Karen Maríu Sigurgeirsdóttur, sem átti skot af stuttu færi sem markvörður Vals varði vel. Færin urðu fleiri, en það var ekki fyrr en á 63. mínútu sem eina mark leiksins leit dagsins ljós. Hildur Anna Birgisdóttir tók þá hornspyrnu frá hægri, Arna Sif skallaði boltann sem síðan barst út í teiginn til Huldu Óskar, hún reyndi skot eða sendingu inn á markteiginn þar sem Margrét tók við boltanum og náði að koma honum yfir marklínuna.

Valur - Þór/KA 0-1 (0-0)

Tölur og fróðleikur

  • 7 - Leikurinn í gær var sá sjöundi sem Allie Augur og liðið heldur markinu hreinu, í 19 leikjum í deildinni í sumar. Þessir sjö leikir komu reyndar allir í síðustu 11 leikjum, það er frá og með 8. umferð mótsins. 
  • 20 - Allie Augur spilaði sinn 20. leik fyrir Þór/KA. Þar af eru 19 í Bestu deildinni og einn í Lengjubikarnum.
  • 90 - Angela Mary Helgadóttir  spilaði sinn 90. meistaraflokksleik. Þar af eru 78 fyrir Þór/KA og 12 fyrir Hamrana.
  • 107 - Samkvæmt skráningu í leikskýrslu voru 107 áhorfendur á leiknum.
  • 310 - Arna Sif Ásgrímsdóttir er komin í 310 leiki fyrir Þór/KA. Þar af eru 216 í efstu deild.

Hópurinn

  • Byrjunarlið: Allie Augur (m), Angela Mary Helgadóttir (Halla Bríet 75'), Libby Moore, María Dögg Jóhannesdóttir, Karen Hulda Hrafnsdóttir, Hildur Anna Birgisdóttir (Agnes Birta 85'), Karen María Sigurgeirsdóttir (Birgitta Rún 85'), Arna Sif Ásgrímsdóttir (f), Margrét Árnadóttir, Hulda Ósk Jónsdóttir (Amalía 67'), Lauren Lapomarda.
  • Varamenn: Harpa Jóhannsdóttir (m), Amalía Árnadóttir (67'), Birgitta Rún Finnbogadóttir (85'), Eva S. Dolina-Sokolowska, Agnes Birta Stefánsdóttir (85'), Halla Bríet Kristjánsdóttir (75'), Emelía Blöndal Ásgeirsdóttir.

Byrjunarliðið gegn Val. Aftari röð frá vinstri: Libby Moore, María Dögg Jóhannesdóttir, Arna Sif Ásgrímsdóttir (f), Karen Hulda Hrafnsdóttir, Hulda Ósk Jónsdóttir og Angela Mary Helgadóttir. Fremri röð frá vinstri: Allie Augur, Karen María Sigurgeirsdóttir, Margrét Árnadóttir, Hildur Anna Birgisdóttir og Lauren Lapomarda.

Næstu leikir

Enn og aftur skal minnt á að síðasti heimaleikur okkar er á dagskrá næsta föstudag, 25. september, kl. 18. Frítt er á leikinn í boði Bílaleigu Akureyrar og Grand þvottar ehf.

25.09.: Valur - Víkingur
25.09.: Þór/KA - Fram
- - -
02.10.: Fram - Valur
02.10.: Víkingur - Þór/KA

 

Til baka