Besta deildin: Tap á síðustu mínútu í Njarðvík

04.05.2026
Byrjunarliðið okkar í leiknum í Njarðvík.
Byrjunarliðið okkar í leiknum í Njarðvík.

Þrátt fyrir ágætan leik að mörgu leyti og góð færi bættust engin stig í pokann í ferð okkar til Njarðvíkur síðastliðinn fimmtudag þegar við mættum liði Grindavíkur/Njarðvíkur í fyrsta heimaleik liðsins í efstu deild og mögulega fyrsta efstudeildarleik á Njarðvíkurvelli, sem þessa dagana gengur undir nafninu JBÓ-völlurinn. Þór/KA náði forystunni með marki Erin Flurey á 15. mínútu, en tvö mörk gestgjafanna í seinni hálfleik færðu þeim öll stigin.

Erin Flurey náði forystunni fyrir Þór/KA eftir stundarfjórðung. Þór/KA vann þá boltann eftir markspyrnu heimaliðsins, María Dögg sendi á Birgittu Rún, hún til baka á Amalíus em átti stungusendingu inn fyrir vörnina á Margréti. Varnarlína Grindavíkur/Njarðvíkur lyfti höndum og vildi fá rangstöðudóm, en þeim skjátlaðist reyndar því Margrét var réttstæð þegar Amalía sendi boltann. Margrét lék inn í teiginn hægra megin og gaf hnitmiðaða sendingu fyrir markið á Erin sem skoraði af öryggi. Erin komst síðan í upplagða stöðu um fimm mínútum síðar þegar hún var komin ein inn fyrir vörn gestgjafanna, en skot hennar fór yfir.

Bæði lið sköpuðu sér nokkur góð færi og góðar stöður í fyrri hálfleiknum, Þór/KA þó fleiri en heimaliðið, en skotin rötuðu ýmist yfir eða þá að markverðir og varnarmenn voru vel á verði og komu í veg fyrir mörk. Svipað var uppi á teningnum í seinni hálfleiknum, nokkur góð færi sem fóru forgörðum hjá okkar liði, en það var hins vegar heimaliðið sem kom boltanum í markið, tvisvar þegar upp var staðið. Natasha Anasi jafnaði á 63. mínútu og Sigríður Emma F. Jónsdóttir skoraði eftir hornspyrnu á lokamínútu leiksins.

Mjög svekkjandi niðurstaða eftir frammistöðu liðsins í leiknum, ágæta spilkafla og sköpuð færi sem ekki nýttust. 

Grindavík/Njarðvík - Þór/KA 2-1 (0-1)

Byrjunarliðið okkar í leiknum. Aftari röð frá vinstri: Arna Sif Ásgrímsdóttir, María Dögg Jóhannesdóttir, Amalía Árnadóttir, Margrét Árnadóttir, Allie Augur og Birgitta Rún Finnbogadóttir. Fremri röð frá vinstri: Erin Flurey, Hulda Björg Hannesdóttif fyrirliði, Elísa Bríet Björnsdóttir, Bríet Jóhannsdóttir og Karen María Sigurgeirsdóttir.

Leikur að tölum

  • 1 - Karen Hulda Hrafnsdóttir spilaði sínar fyrstu mínútur í Bestu deildinni þegar hún kom inn af varamannabekknum undir lok leiks. Karen Hulda á þó að baki meistaraflokksleiki, með Þór/KA í Lengjubikar fyrr í vetur og Dalvík í 2. deild, Mjólkurbikar og Lengjubikar í fyrra, samanlagt 18 leiki, þar af fimm fyrir Þór/KA.
  • 120 - Áhorfendur á Njarðvíkurvelli, sem þessa dagana gengur undir nafninu JBÓ-völlurinn, voru skráðir 120 talsins.
  • 140 - Margrét Árnadóttir spilaði sinn 140. leik í efstu deild á Íslandi, en hún á að auki fimm leiki með Parma í A-deildinni á Ítalíu 2022. Leikirnir 140 ná yfir 11 tímabil, þeir fyrstu voru 2016.
  • 330 - Hulda Ósk Jónsdóttir spilaði sinn 330. leik í meistaraflokki, en hún á að baki 198 leiki í efstu deild með Þór/KA og KR, auk leikja með Völsungi í næstefstu deild. Bikarleikirnir eru samtals 27, ásamt 66 leikjum í deildabikar, tveimur í Meistarakeppni KSÍ og fimm Evrópuleikjum.
  • 430 - Arna Sif Ásgrímsdóttir, sem er á sínu 20. tímabili í meistaraflokki, spilaði sinn 430. meistaraflokksleik á ferlinum. Í þeirri tolu eru leikir í deildakeppnum þriggja landa, bikarkeppni, deildabikarkeppni, Meistarakeppni KSÍ og Evrópuleikir, en ótaldir eru leikir í vetrar- og æfingamótum eins og Kjarnafæðimótinu og Reykjavíkurmótinu. Af þessum 430 leikjum eru 280 í efstu deildum með Þór/KA og Val á Íslandi, Göteborgs/Kopparberg í Svíþjóð og Verona á Ítalíu. Í tölunni eru 32 bikarleikir, 77 leikir í deildabikar, sex í Meistarakeppni KSÍ og 15 Evrópuleikir. 
Til baka