Besta deildin: Þór/KA tekur á móti Val á morgun

300! Náum við 300 áhorfendum á leikinn á morgun? Birgir Örn Reynisson afhenti Örnu Sif Ásgrímsdóttur treyju við upphaf síðasta leiks sem viðurkenningarvott eftir að Arna Sif spilaði sinn 300. leik fyrir Þór/KA fyrr í sumar. Arna Sif er komin í 306 leiki fyrir Þór/KA, þar af 212 í efstu deild, en hún á einnig 111 leiki með Val, þar af 75 í efstu deild. Mynd: Ármann Hinrik.

- - -

Þór/KA tekur á móti Val í 17. umferð Bestu deildarinnar á morgun, föstudaginn 21. ágúst. Flautað verður til leiks kl. 18.

Fyrir þau sem ekki þekkja til fyrirkomulags á keppninni í Bestu deild kvenna er það í grundvallaratriðum svona:

• Tíu liða deild, spiluð tvöföld umferð, samtals 18 leikir á lið.
• Eftir 18 umferðir er deildinni tvískipt, annars vegar sex efstu liðin og hins vegar fjögur neðstu.
• Sex efstu liðin mætast innbyrðis í einfaldri umferð. Þrjú efstu liðin fá þrjá heimaleiki, en liðin í 4.-6. sætinu fá tvo heimaleiki. Þessi lið spila því samtals 23 leiki, 18 fyrir skiptingu og fimm í framhaldinu.
• Fjögur neðstu liðin mætast einnig innbyrðis í einfaldri umferð. Liðin í 7. og 8. sætinu fá tvo heimaleiki, en liðin í 9. og 10. sæti fá einn heimaleik. Þessi fjögur lið spila því 21 leik í mótinu, 18 fyrir skiptingu og þrjá eftir.
• Stigafjöldi leggst saman og raðast liðin eftir því, en þó þannig að lið úr neðri hlutanum getur ekki endað í efri hlutanum að loknu móti. Efsta lið verður Íslandsmeistari, tvö efstu liðin fá þátttökurétt í Evrópukeppni og tvö neðstu liðin falla niður um deild.

Mæting á völlinn og jákvæður stuðningur skipta máli

Því miður hefur aðsókn að leikjum okkar í Bestu deildinni dregist saman á undanförnum árum. Sjálfboðaliðar á okkar vegum telja í stúkunni á hverjum heimaleik og er tala yfir fjölda áhorfenda færð á leikskýrslu. Þetta er gert af nokkurri nákvæmni, ekkert giskað og engar ýkjur. Að meðaltali hafa um 113 manns mætt á hvern heimaleik okkar í Bestu deildinni í sumar. Við erum auðvitað þakklát hverjum og einum sem mætir á einn leik eða fleiri. Flestir áhorfendur mættu á fyrsta deildarleikinn okkar þann 25. apríl gegn FH, eða 177. Næstflestir mættu í stúkuna þegar Jóhann Kristinn mætti norður með Þrótt þann 22. júní, eða 171. Fæstir hafa áhorfendur verið 65. En okkur langar að fá fleiri á völlinn.

Hver vill ekki taka þátt í og upplifa svona augnablik? Karen Hulda Hrafnsdóttir, fædd 2009, fagnar hér sínu fyrsta marki í Bestu deildinni. Mynd: Ármann Hinrik.

Oft hefur verið minnt á það á vef og samfélagsmiðlum félagsins að mæting á völlinn skiptir máli, jákvæður stuðningur úr stúkunni skiptir máli. Hér með er skorað á Akureyringa að taka þátt í að bæta áhorfendametið okkar í sumar í hverjum einasta heimaleik sem eftir er. Til þess þurfum við 178 manns á leikinn á morgun, en væri auðvitað gaman að fara bara beint í 300.

Það kann að hljóma eins og klisja, en það skiptir í alvöru máli fyrir leikmenn inni á vellinum að fá fleiri á völlinn og fá jákvæða strauma og öflugan stuðning í leikjunum. Slíkt getur skipt sköpum ef neistann vantar - þá getum við kveikt hann. Oft er það þannig á íþróttakappleikjum að áhorfendur bíða eftir því að liðið þeirra fari í gang og kveiki í þeim neistann - en auðvitað ætti það að vera öfugt. Fyrir leik og um leið og leikur hefst eigum við að taka þátt í að kveikja í liðinu okkar, ekki bíða eftir að liðið kveiki í okkur. 

Tökum þátt í gleðinni og hjálpum til við að skapa hana. Mynd: Ármann Hinrik.

Hvert stig skiptir máli

Baráttan fram undan í þeim þremur umferðum sem eftir eru fyrir tvískiptingu er jöfn og spennandi. Núna munar átta stigum á liðunum í 5. og 10. sæti þegar níu stig eru í pottinum. Breiðablik tók toppsætið með 3-0 sigri á FH í síðustu umferð. Breiðablik er með 36 stig, FH með 33 stig. Næst koma ÍBV með 24 stig og Stjarnan 23 stig. Af öðrum liðum munu tvö ná að verða fyrir ofan strik við tvískiptinguna. Sem stendur eru það Grindavík/Njarðvík og Þór/KA.

Staða neðstu sex liða er þessi:

• 5. Grindavík/Njarðvík
  19 stig
  -6 í markamun
  Leikir eftir: Fram (h), Víkingur (ú), Valur (h)
• 6. Þór/KA 
  18 stig
  -2 í markamun
  Leikir eftir: Valur (h), Þróttur (ú), FH (ú)
• 7. Þróttur
  18 stig
  -4 í markamun
  Leikir eftir: ÍBV (ú), Þór/KA (h), Breiðablik (h)
• 8. Fram
  16 stig
  -13 í markamun
  Leikir eftir: Grindavík/Njarðvík (ú), Stjarnan (h), ÍBV (ú)
• 9. Valur
  13 stig
  -13 í markamun
  Leikir eftir: Þór/KA (ú), FH (h), Grindavík/Njarðvík (ú)
• 10. Víkingur 
  11 stig
  -16 í markamun
  Leikir eftir: FH (ú), Grindavík/Njarðvík (h), Stjarnan (ú)

Tökum þátt í gleðinini og hjálpum til við að skapa hana. Mynd: Ármann Hinrik.

Leikir 17. umferðar

Þó svo liðin eigi enn eftir þrjá leiki er það 17. umferðin sem er næst á dagskrá, einfaldlega vegna þess að 10. umferð mótsins, sem átti að spilast í lok júní, var færð aftur fyrir mótið vegna þátttöku U19 landsliðsins í lokamóti EM í byrjun júlí. Það þýðir að 10. umferðin verður spiluð 6. september, en í millitíðinn er 18. umferðin á dagskrá 29. ágúst.

Leikir 17. umferðarinnar verða spilaðir í dag og á morgun.

• 20.08.: Grindavík/Njarðvík - Fram
• 20.08.: Stjarnan - Breiðablik
• 21.08.: FH - Víkingur
• 21.08.: ÍBV - Þróttur
• 21.08.: Þór/KA - Valur