Lengjubikarinn: Hulda Ósk með þrennu í sigri á FHL

Þór/KA vann öruggan sigur á liði FHL þegar liðin mættust í Fjarðabyggðarhöllinni á Reyðarfirði föstudaginn 27. febrúar. Ekki hefur gefist tími til að segja frá leiknum hér á síðunni fyrr en nú - en betra er seint en aldrei. Tvær voru í fyrsta skipti í byrjunarliði í meistaraflokki Þórs/KA og tvær skoruðu sitt fyrsta mark með meistaraflokki félagsins.

Um leikinn þarf kannski ekki að fjölyrða. FHL tefldi fram mjög ungum leikmönnum í þessum leik eins og öðrum leikjum liðsins í mótinu, engum erlendum leikmönnum. 

Það tók leikmenn Þórs/KA um 19 mínútur að koma inn fyrsta markinu. Margrét Árnadóttir fékk þá sendingu fyrir markið frá systur sinni, Amalíu, og skoraði af öryggi. Margrét var í fyrsta skipti í byrjunarliði hjá Þór/KA síðan í byrjun september í fyrra. Hún kom inn á sem varamaður í síðasta leik og spilaði fyrri hálfleikinn í gær.

Eftir mark Margrétar var aldrei spurning hvert stefndi. Hulda Björg Hannesdóttir bætti við öðru markinu fimm mínútum síðar eftir hornspyrnu, og aðeins þremur mínútum eftir mark Huldu Bjargar skoraði Bríet Fjóla Bjarnadóttir þriðja mark Þórs/KA og sitt fjórða mark í mótinu. Þá var komið að Huldu Ósk. Hún skoraði á 32. mínútu og aftur á lokamínútu fyrri hálfleiksins. Þór/KA með 5-0 forystu eftir fyrri hálfleikinn.

Hulda Ósk hélt svo uppteknum hætti og kláraði þrennuna eftir átta mínútna leik í seinni hálfleiknum. Eftir þrennuna hjá Huldu Ósk var um 20 mínútna bið eftir næsta marki. Ísey Ragnarsdóttir kom inn af varamannabekknum á 73. mínútu og aðeins mínútu síðar hafði hún skorað sjöunda mark liðsins, hennar fyrsta með meistaraflokki Þórs/KA. Amalía Árnadóttir skoraði áttunda markið þegar um sjö mínútur voru til leiksloka og Aníta Ingvarsdóttir lokaði dæminu með marki þremur mínútum síðar, hennar fyrsta með meistaraflokki Þórs/KA.

FHL - Þór/KA 0-9 (0-5)

• 0-1 - Margrét Árnadóttir (19'). Stoðsending: Amalía Árnadóttir.
• 0-2 - Hulda Björg Hannesdóttir (24'). Stoðsending: Karen María Sigurgeirsdóttir.
• 0-3 - Bríet Fjóla Bjarnadóttir (27'). Stoðsending: María Dögg Jóhannesdóttir.
• 0-4 - Hulda Ósk Jónsdóttir (32'). Stoðsending: Margrét Árnadóttir.
• 0-5 - Hulda Ósk Jónsdóttir (45'). Stoðsending: Amalía Árnadóttir.
  - - -
• 0-6 - Hulda Ósk Jónsdóttir (53'). Stoðsending: Bríet Jóhannsdóttir.
• 0-7 - Ísey Ragnarsdóttir (74'). Stoðsending: Bríet Jóhannsdóttir.
• 0-8 - Amalía Árnadóttir (83'). Stoðsending: Aníta Ingvarsdóttir.
• 0-9 - Aníta Ingvarsdóttir (86'). Stoðsending: Amalía Árnadóttir.
• Leikskýrslan á vef KSÍ
• Staðan í riðlinum

Tölur og fróðleikur

• 1 - Ísey Ragnarsdóttir skoraði sjöunda mark liðsins á 74. mínútu. Þetta var hennar fyrsta mark í meistaraflokki í KSÍ-leik, en hún hefur komið við sögu í 13 leikjum í meistaraflokki, sjö í Bestu deildinni og sex í Lengjubikarnum.
• 1 - Aníta Ingvarsdóttir var í fyrsta skipti í byrjunarliði með Þór/KA í leiknum og skoraði sitt fyrsta mark með meistaraflokki félagsins. Þetta var þó ekki hennar fyrsta mark í meistaraflokki því hún spilaði 17 leiki og skoraði 11 mörk með Dalvík/Reyni í 2. deild, bikarkeppni og Lengjubikar í fyrra.
• 3 - Hulda Ósk Jónsdóttir skoraði þrennu í leiknum á um 22 leikmínútum, en tvö þeirra komu í fyrri hálfleik og eitt snemma í þeim seinni. 
• 44 - Áhorfendur á leiknum voru 44.
• 50 - Bríet Fjóla Bjarnadóttir spilaði sinn 50. meistaraflokksleik í KSÍ-mótum með Þór/KA. Af þessum 50 leikjum eru 32 leikir og 3 mörk í Bestu deildinni, fjórir leikir og eitt mark í bikarkeppninni og 14 leikir og fimm mörk í Lengjubikarnum. Hún hefur skorað í öllum fjórum leikjum liðsins í Lengjubikarnum hingað til, eitt mark í hverjum leik og er markahæst í liðinu til þessa.