Erin Flurey skoraði 800. mark Þórs/KA í efstu deild

Erin umvafin af liðsfélögunum eftir markið. Birgitta Rún Finnbogadóttir, Hildur Anna Birgisdóttir og Erin Flurey fagna tímamótamarkinu sem Erin skoraði á 90. mínútu leiksins. Svo skemmtilega vill til að þessar þrjár komu allar inn af varamannabekknum í seinni hálfleiknum. Mynd: Ármann Hinrik.

Jöfnunarmark Erin Flurey á 90. mínútu leiks Þórs/KA og FH í 1. umferð Bestu deildarinnar í dag var 800. mark sem skorað er fyrir Þór/KA í efstu deild Íslandsmótsins. 

Erin hefur aðeins leikið einn leik áður fyrir Þór/KA og var sá leikur einnig gegn FH. Þar skoraði hún þrennu á 40 mínútum í fyrri hálfleiknum í 4-2 sigri Þórs/KA. Hún er því komin með fjögur mörk í tveimur leikjum, eða raunar einum leik og einum hálftíma því hún var á varamannabekknum í dag, en var skipt inn á þegar rúmur hálftími var eftir. Nánar verður fjallað um leikinn hér á vefnum í kvöld eða á morgun.

Þór/KA spilaði í efstu deild árið 2000-2004 og aftur 2006 og hefur verið í efstu deild síðan. Nýhafið tímabil er það 24. í röðinni sem Þór/KA hefur spilað óslitið í efstu deild og 29. tímabilið alls í efstu deild. 

Mörkin 800 hafa verið skoruð í 436 leikjum, eða 1,83 mörk að meðaltali í leik. Flest mörk á einu tímabili komu 2009, 64 mörk í 18 leikjum, eða 3,56 mörk í leik. Fæst urðu þau 2003, tíu mörk í 14 leikjum, eða 0,71 mark í leik.

Hverjar skoruðu á hinum hundruðunum?

• 100 - Rakel Hönnudóttir á 90. mínútu í 2-0 sigri á HK/Víkingi 24. maí 2008.
• 200 - Katla Ósk Rakelardóttir á 69. mínútu í 5-1 heimasigri gegn Aftureldingu/Fjölni 14. september 2009
• 300 - Marie Perez Fernandez á 42. mínútu í 4-0 heimasigri gegn KR 10. september 2011
• 400 - Arna Sif Ásgrímsdóttir á 70. mínútu í 2-1 heimasigri gegn Aftureldingu 2. júní 2014
• 500 - Sandra María Jessen á 72. mínútu í 6-0 heimasigri gegn Fylki 24. september 2016
• 600 - Andrea Mist Pálsdóttir á 88. mínútu í 2-0 heimasigri gegn Fylki 8. maí 2019
• 700 - Una Móeiður Hlynsdóttir á 68. mínútu í 5-0 sigri gegn Tindastóli 21. júní 2023

Erin hleður í skotið sem færði Þór/KA annað stigið í leiknum í dag. Mynd: Ármann Hinrik.