Níu ár frá fyrsta Íslandsmeistaratitlinum

Fyrirliðinn, Arna Sif Ásgrímsdóttir, lyftir bikarnum. Ágústa Kristinsdóttir og Helena Rós Þórólfsdóttir taka þátt í gleðinni. Mynd: Þórir Tryggva

Það er ekki tilviljun að Þór/KA opnar nýjan vef sinn – thorka.is – á þessum degi, 4. september. Í dag eru nákvæmlega níu ár síðan við tryggðum okkur Íslandsmeistaratitilinn í fyrsta skipti.

Þann 4. september 2012 fengum við lið Selfoss í heimsókn á Þórsvöllinn og þurftum á þeim tíma þrjú stig til að vera öruggar með titilinn, í keppni við ÍBV og Stjörnuna, en leikurinn var í næstsíðustu umferð mótsins.

Það var auðvitað nokkuð kappsmál að geta tryggt titilinn á heimavelli og greinilegt að bæjarbúar voru á sama máli því þeir flykktust á völlinn – 1.212 áhorfendur skráðir í leikskýrsluna – til að hvetja stelpurnar og taka þátt í væntanlegri sigurgleði. Vallargestir urðu ekki fyrir vonbrigðum því leiknum lauk með 9-0 sigri og afhendingu Íslandsmeistarabikarsins í fyrsta skipti að leik loknum.

Eini leikmaðurinn sem tók þátt í þessum leik og er enn á fullu með Þór/KA er þáverandi og núverandi fyrirliði, Arna Sif Ásgrímsdóttir.

Lokastaðan í deildinni og yfirlit leikja (ksi.is).

Meðfylgjandi myndir tók Þórir Tryggvason þetta eftirminnilega kvöld í september 2012.