Karfan er tóm.
Agnes Birta Stefánsdóttir (1997) hefur undirritað nýjan samning við stjórn Þórs/KA og verður áfram í herbúðum félagsins næstu tvö árin hið minnsta.
Agnes Birta hefur spilað sem miðvörður mestallan sinn feril í meistaraflokki, en hún spilaði sem miðjumaður í yngri flokkum og fyrstu árin í meistaraflokki. Hún hefur verið í byrjunarliði Þórs/KA í nær öllum leikjum undanfarin ár, klettur í vörninni og hefur stöðvað ófáar hraðar sóknir andstæðinganna með tæklingum á hárréttum augnablikum, ásamt því að bægja hættunni frá þegar andstæðingarnir gera sig líklega inni í teignum hjá Þór/KA. Grjóthörð og gefur ekkert eftir.
Jóhann Kristinn Gunnarsson, þjálfari Þórs/KA, fagnar því að Agnes Birta taki slaginn áfram næstu tvö árin.
„Agnes Birta er jaxl sem gefur aldrei neitt eftir. Það er mjög gott fyrir Þór/KA að hún skrifi undir nýjan samning og við njótum því krafta hennar áfram. Gefur sig alltaf alla í leiki og æfingar og verður bara betri með hverjum deginum. Hún er klárlega ein af þessum stoðum sem eru að styrkjast undir þeirri vegferð sem Þór/KA ætlar sér að feta áfram í átt að settum markmiðum,“ segir Jóhann Kristinn um Agnesi Birtu.
Agnes Birta hefur spilað samanlagt 129 leiki í meistaraflokki, í Íslandsmóti, bikarkeppni og deildabikar, þar af eru 104 leikir fyrir Þór/KA. Auk 104 leikja fyrir Þór/KA á Agnes Birta að baki 22 leiki í næstefstu deild, en hún spilaði 12 leiki með Hömrunum í Inkasso-deildinni 2018 og tíu með Tindastóli í Lengjudeildinni 2020.
Agnes var beðin um að velja uppáhaldsleik sinn eða upplifun á ferlinum og uppáhaldsmarkið:
Uppáhaldsleikur | Leikur í 4. umferð Bestu deildarinnar 15. maí 2023, 2-0 sigur á Breiðabliki í Boganum. |
Uppáhaldsmark | Þrumuskot fyrir utan teig í 5-1 sigri gegn ÍBV á Þórsvellinum 25. júlí 2019. Markið skoraði Agnes Birta á 60. mínútu og kom Þór/KA í 3-1, með skoti af 20-25 metra færi. |
Hér má sjá mark Agnesar Birtu gegn ÍBV á Þórsvellinum 2019, ásamt reyndar öðrum mörkum liðsins þetta sumar. Agnes Birta hefur skorað þrjú mörk í efstu deild og var þetta hennar fyrsta mark í meistaraflokki.
Leikir |
Íslandsmót |
Bikarkeppni |
2025 | 14 | 1 |
2024 | 21 | 3 |
2023 | 20 | 1 |
2022 | ||
2021 | 4 | |
2020 | 12 | 1 |
2019 | 3 | 1 |
2018 | 12 | |
2017 | 8 | 2 |
2016 | ||
2015 | 1 | |
Samtals |
95 | 9 |
2020 - Lánssamningur - Spilaði tvo leiki með Þór/KA í Pepsi Max-deildinni og einn í Mjólkurbikarnum, ásamt tíu leikjum fyrir Tindastól í Inkasso-deildinni. | ||
2018 - Lánssamningur - spilaði 12 leiki fyrir Hamrana í Inkasso-deildinni. | ||
Agnes Birta stundaði háskólanám og spilaði fótbolta í Bandaríkjunum á árunum 2018-2022, fyrst í Georgíuríki og síðan í Ohio. | ||
Auk leikja í Íslandsmóti og bikarkeppni á Agnes Birta að baki 25 leiki í deildabikarkeppnum. |
||
Agnes Birta hlaut Kollubikarinn sem veittur var á lokahófi félagsins haustið 2023, en sú viðurkenning hefur verið veitt árlega frá haustinu 2016 í minningu Kolbrúnar Jónsdóttur, fyrrum leikmanns og stjórnarkonu. Við val á þeim leikmanni sem hlýtur Kollubikarinn eru hafðir til hliðsjónar eiginleikar sem prýddu Kollu sjálfa, áræðni, harka og dugnaður, svo einhverjir séu nefndir. |