Besta deildin: Jafntefli í lokaleiknum

Jafntefli varð niðurstaðan í lokaleik liðsins í Bestu deildinni þegar Þór/KA tók á móti Fram í Boganum á fimmtudagskvöld. Liðið endar því tímabilið í 7. sæti deildarinnar.

Fram komst yfir með marki á 35. mínútu, en aðeins örstuttu áður hafði Þór/KA fengið dauðafæri. Karen María Sigurgeirsdóttir jafnaði leikinn með glæsilegu marki langt fyrir utan vítateig þegar tæpur stundarfjórðungur var liðinn af seinni hálfleiknum. Litlu munaði að við næðum inn sigurmarki á lokasekúndunum þegar Ellie Moreno átti fyrirgjöf fyrir markið og þrjár úr okkar liði, Emelía Ósk Krüger, Ísey Ragnarsdóttir og Henríetta Ágústsdóttir, áttu marktilraunir, varnarmenn og markvörður Fram komust fyrir skotin. 

Þór/KA - Fram 1-1 (0-1)

• 0-1 - Lily Anna Farkas (35').
• 1-1 - Karen María Sigurgeirsdóttir (58'). Stoðsending: Amalía Árnadóttir.
• Leikskýrslan
• Besta deildin - neðri hluti 

Þór/KA endar í 7. sæti deildarinnar, efsta sæti neðri hlutans eftir tvískiptingu deildarinnar, með 28 stig úr 21 leik. Liðið vann níu leiki, gerði eitt jafntefli og tapaði 11 leikjum. 

Tölur og fróðleikur

• 10 - Ísey Ragnarstóttir  spilaði 10. leik sinn í meistaraflokki og var hársbreidd frá því að skora fyrsta markið sitt í Bestu deildinni.
• 20 - Ellie Moreno spilaði sinn 20. leik fyrir Þór/KA.
• 20 - Jessica Berlin spilaði sinn 20. leik í Bestu deildinni.
• 40 - Angela Mary Helgadóttir spilaði sinn 40. leik í efstu deild.
• 80 - Sonja Björg Sigurðardóttir spilaði 80. meistaraflokksleikinn. Þar af eru 42 fyrir Þór/KA.
• 220 - Karen María Sigurgeirsdóttir hefur spilað 220 leiki í meistaraflokki. þar af eru 168 fyrir Þór/KA.