Hulda Ósk Jónsdóttir undirritar nýjan samning

Hulda Ósk Jónsdóttir (1997) hefur undirritað nýjan samning við stjórn Þórs/KA og verður áfram í herbúðum félagsins næstu tvö árin hið minnsta. 

Ef til vill er óþarfi að kynna Huldu Ósk fyrir stuðningsfólki okkar enda er hún á sínu 10. tímabili með Þór/KA og 14. ári samanlagt í meistaraflokki. Hún hefur nú ákveðið að bæta að minnsta kosti tveimur tímabilum við þennan feril með undirritun nýs samnings sem gildir út tímabilið 2027. Hulda Ósk á að baki 258 leiki með Þór/KA í Íslandsmóti, bikarkeppni, deildabikarkeppni, meistarakeppni KSÍ og Meistaradeild Evrópu. Leikirnir í efstu deild eru samanlagt 189, þar af 173 með Þór/KA og 16 með KR. 

Jóhann Kristinn Gunnarsson, þjálfari Þórs/KA, er ánægður með að hafa Huldu Ósk áfram í okkar röðum. 

„Það er frábært fyrir okkur í Þór/KA að Hulda Ósk skrifi undir nýjan samning. Hulda er einn af þessum leikmönnum sem hefur varðað leið Þór/KA í fjöldamörg ár. Ólíkindatól með boltann og gefur liðinu alltaf einhverja spennandi kosti í sókninni. Gríðarleg reynsla, hæfileikar og frábær karakter sem á klárlega eftir að hjálpa liðinu að ná markmiðum sínum á næstunni,“ segir Jóhann Kristinn um Huldu Ósk.

Langur meistaraflokksferill

Hulda Ósk hefur nánast allan sinn feril spilað á hægri kantinum þaðan sem hún hefur lagt upp ófá mörkin fyrir samherja sína með því ýmist að tæta sig í gegnum varnir andstæðingana eða koma með óvæntar og frábærar fyrirgjafir á samherjana. Í 316 meistaraflokksleikjum hefur hún svo einnig sjálf skorað 59 mörk.

Hulda Ósk hóf meistaraflokksferilinn með uppeldisfélaginu, Völsungi á Húsavík, sumarið 2012 og spilaði fyrir Völsung í 1. deildinni 2012-2013. Eftir stutta viðkomu hjá Þór/KA og fimm leiki í Lengjubikarnum snemma árs 2013 snéri hún aftur til baka í Völsung. Þaðan fór hún síðan í KR og tók tvö tímabil með Vesturbæjarliðinu, 2014 í 1. deild og 2015 í Pepsi-deildinni. Hún snéri svo aftur til Akureyrar og hóf að leika með Þór/KA í ársbyrjun 2016. Hér hefur hún verið síðan þá ef frá er talinn einn vetur með háskólaliði Notre Dame í Bandaríkjunum. Hulda Ósk er því á sínu 10. tímabili með Þór/KA og 14. tímabili samanlagt í meistaraflokki.

Leikurinn gegn Wolfsburg og markið gegn Stjörnunni í uppáhaldi

Hulda Ósk var beðin um að nefna uppáhaldsleik eða upplifun með Þór/KA og uppáhaldsmark:

Hér má sjá markið umrædda sem Hulda Ósk nefnir, ásamt reyndar öðrum mörkum liðsins sumarið 2017.

• Fyrsta meistaraflokksleikinn spilaði Hulda Ósk á Húsavíkurvelli 21. júlí 2012 þegar Völsungur mætti Grindavík í B-riðli 1. deildar. Á þeim tíma var 2. deild kvenna ekki til heldur var 1. deildinni skipt í riðla.
• Fyrsta markið í meistaraflokki skoraði hún á Torfnesvelli á Ísafirði í 4-0 sigri Völsungs á BÍ/Bolungarvík 13. ágúst 2012.
• Fyrsta leikinn með Þór/KA spilaði Hulda Ósk 2. mars 2013 gegn Val í Lengjubikarnum.
• Hulda Ósk var í fyrsta skipti í byrjunarliði hjá Þór/KA í 2-0 sigri á Selfyssingum í Boganum 19. mars 2016.
• Fyrsta markið með Þór/KA skoraði Hulda Ósk í 6-0 sigri á Grindvíkingum 11. júní 2016 í 16 liða úrslitum bikarkeppninnar.