Margrét Árnadóttir: 200 leikir fyrir Þór/KA

Margrét Árnadóttir spilaði í gær sinn 200. meistaraflokksleik með Þór/KA þegar liðið mætti FH í Kaplakrika í 13. umferð Bestu deildarinnar. Fyrstu meistaraflokksleikina spilaði hún 2016 og er því á sínu 10. tímabili hjá félaginu. Auk leikjanna 200 fyrir Þór/KA var hún um tíma í bandaríska háskólaboltanum og í efstu deild Ítalíu seinni hluta tímabilsins 2021-22.

Margrét skoraði eitt þriggja marka Þórs/KA þegar hún spilaði sinn 200. leik fyrir félagið, gegn FH í Kaplakrika á þriðjudag, en það dugði því miður ekki til því lokatölur leiksins urðu 5-3 FH í vil. 

Leikir og mörk:

Margrét á að baki fimm leiki með Parma Calcio 1913 á Ítalíu á fyrri hluta árs 2022. Þá eru 26 leikir (23 mörk) í Kjarnafæðimótinu (eða öðrum vetrarmótum) sem skráðir eru í gagnagrunn KSÍ, en þau mót ekki viðurkennd  sem fullgild mót af KSÍ og leikirnir því ekki skráðir sem slíkir. Hún á einnig að baki sjö leiki með U16 og U19 landsliðum Íslands.

• Fyrsti leikur í meistaraflokki, Lengjubikar, A-deild: 19. mars 2016 í 2-0 sigri gegn Selfossi í Boganum
• Fyrsti leikur í efstu deild: 11. maí 2016 í 4-0 tapi gegn Stjörnunni á Samsungvellinum í þáverandi Pepsi-deild.
• Fyrsta mark í efstu deild: 29. júní 2016 í 6-1 tapi gegn Val á Valsvellinum í Pepsi-deildinni. Margrét kom þá inn sem varamaður á 82. mínútu og skoraði eina mark liðsins á 86. mínútu. Svo skemmtilega vill til að tveir úr dómarateymi þess leiks voru einnig í teyminu í 200. leik Margrétar. Óli Njáll Ingólfsson dæmdi leikinn 2016, en hann var varadómari í 200. leiknum. Þá var Ásgeir Viktorsson aðstoðardómari 2 í leiknum 2016 og aðstoðardómari 1 í leiknum gegn FH á þriðjudaginn.
• Fyrsta skipti í byrjunarliði í efstu deild: 27. apríl 2017 í 1-0 sigri á Val í 1. umferð

Margrét Árnadóttir í leik í 16 liða úrslitum Mjólkurbikarkeppninnar í maí þegar Þór/KA vann KR 6-0. Mynd: Ármann Hinrik.

Margrét Árnadóttir í leik í Boganum fyrr í sumar. Mynd: Ármann Hinrik.